❞ حين يهمس القلب ❝ ⏤ محمود بكر صبري

الكاتب محمود بكر
كاتب وشاعر بحكي بالكلمات عن اللي بنحسه ومش دايمًا بنعرف نقوله.
خريج كلية تمريض، يمكن عشان كده عندي شغف إني أكتب عن الجروح اللي مبتبانش، اللي جوه القلوب والعقول ، بحب الحروف اللي تحتوي، وتدفّي، وتطبطب قبل ما تنصح.
بكتب عشان كل حد حس بالوحدة وسط الناس، وعشان اللي عنده كلام متكتم جواه ومش لاقي حد يسمعه.
بحاول بكلماتي أكون الحضن اللي في كتاب، والصديق اللي مش بيزهق من الكلام.
لو لقيت نفسك في اللي بكتبه، فـ اعرف إنك مش لوحدك.
محمود بكر صبري - السيرة الذاتية – محمود بكر صبري
الشاعر اللي بيوجع بكلامه.. ويطيب بكلامه برضو أنا مش بس شاعر، أنا وجع لابس كلمات، وقلب بيكتب عشان يخفف عن غيره قبل ما يخفف عن نفسه.
أنا ‵محمود بكر صبري‵، خريج كلية التمريض، وأخصائي نفسي، بس قبل أي حاجة، أنا إنسان بيسمع كويس، وبيعرف يحتوي، ويطبطب بكلمة قبل ما يمد إيده. في طريقي، كتبت علشان أعيش، وكتبت علشان أخلّي اللي حواليّ يلاقوا نفسهم بين السطور.
اشتغلت على نفسي كتير، وقررت إن العلم يبقى طريق للرحمة، فدرست علم النفس، وبعمل جلسات ودورات مجانية في العلاج النفسي لكل اللي محتاج، من غير ما أستنى مقابل، لأني مؤمن إن الكلمة الطيبة ممكن تكون حياة لحد فقد الأمل. أعمالي المنشورة: 1. حكايات من القلب – خواطر طالعة من وجع حقيقي وحب أنضجته الأيام.
2. ما بعد الوجع – رحلة بين كسر القلب والتعافي.
3. عشق عبر المجرات – رواية خيال علمي رومانسي، بتحكي عن حب بيتحدى الزمن والمكان.
4. حين يهمس القلب – كتاب خواطر بيحضن القارئ من أول صفحة.
5. حين يظهر الأمل – كتاب بيدّي النور لللي مش شايف طريقه.
6. داخل الذاكرة المفقودة – رواية تشويق نفسي بتغوص في أعماق العقل والهوية.
7. ديوان ‵لسه فيا منك حتة‵ – ٤٠ قصيدة باللهجة العامية المصرية، بترتب مراحل الحب والوجع والحنين.
8. ديوان ‵أنا اللي فاضل مني وجع‵ – ٦٠ قصيدة عامية، من أعمق ما كتبت، بتوجع وتطيب، بتنكسر وتقوم. الجوائز والتكريمات:
تم تكريمي في عدة مسابقات شعرية وأدبية، وحصلت على شهادات تقدير بتشهد على رحلة تعبت فيها، بس عمري ما فقدت شغفي ولا طيبة قلبي. رسالتي:
أنا بكتب علشان اللي موجوع، يلاقي في كلامي حتة من نفسه.
بكتب علشان اللي وحيد، يحس إنه مش لوحده.
وبفيد الناس بعلمي، علشان لو معرفتش أغير الدنيا، أغير بس يوم حد فيها للأحسن. أنا مش بس شاعر..
أنا ‵وجع بيتحول لبلسم‵، و‵كلمة بتفضل محفورة في القلب‵.
ولو وصلت لآخر السيرة دي.. فـ غالبًا قلبك زي قلبي.. بيحب الحنين، وبيصدق الكلمة.
من يوميات وخواطر خواطر أدبية - مكتبة الكتب والموسوعات العامة.